کراچی : انسانی خدمت اور امدادی کارکنان کا پہلا عالمی دن آج منایا جارہا ہے۔اقوام متحدہ کے جنرل سیکرٹری بان کی مون نے اپنے پیغام میں انسانیت کی خدمت کرنے والوں کو خراج تحسین پیش کیا ہے۔
ہرسال انیس اگست کو انسانی خدمت کا عالمی دن منانے کا فیصلہ گیارہ دسمبر دوہزار آٹھ کو اقوام متحدہ میں سویڈن کی جانب سے پیش کردہ قرارداد منظور کرکے کیا گیا تھا۔اقوام متحدہ کے جنرل سیکٹری بان کی مون نے اس سلسلے میں اپنے پیغام میں کہا ہے کہ آج کے دن مظلوم، لاچار اور استحصال زدہ انسانیت کی مدد اور خدمت کا عزم کرنے کا دن ہے۔انسانیت کی خدمت کرنے والوں اور اس عظیم عمل میں زندگیاں قربان کرنے والوں کو سلام پیش کرنے کا دن ہے۔
گزشتہ دس سال میں امدادی کارروائیوں کے دوران سات سو سے زائد امدادی کارکنان کو اپنی جان سے ہاتھ دھونے پڑے۔انسانی خدمت اور امدادی کارکنان کا منایا جانے والا پہلا عالمی دن انہی سات سو کارکنان کے نام کیا گیا ہے۔
