لندن : ایم کیو ایم کے قائد الطاف حسین نے کہا ہے کہ بلوچ قوم کے خلاف آپریشن بند کرکے بلوچوں کو گلے لگایا جائے۔
لندن سے جاری ہونے والے اپنے بیان میں انہوں نے کہا کہ بلوچستان کے عوام کے ساتھ بہت ناانصافی ہوئی ہے،اب ان کے ساتھ انصاف کیا جائے۔ انہوں نے ارباب اختیار سے مطالبہ کیا کہ جو بلوچ رہنماپہاڑوں پر چلے گئے ہیں انہیں بھی بلا کر بات چیت کی جائے۔
دوسری طرف اکبر بگٹی کے پوتے شاہ زین بگٹی نے الطاف حسین سے فون پر گفتگو کی ۔ اور کہاکہ ایم کیوایم نے بلوچ عوام کیلئے ہر فورم پر آوازاٹھائی ہے۔ تاہم بعض لوگوں نے بلوچوں اور ایم کیو ایم کے درمیان غلط فہمیاں پیداکیں ۔ شاہ زین بگٹی نے کہاکہ مظلوم قوموں کے حقوق کی جدوجہد کیلئے انہیں ایک دوسرے کاساتھ د یناچاہیے۔
اس موقع پر الطاف حسین نے شاہ زین بگٹی کویقین دلاتے ہوئے کہاکہ۔ ایم کیو ایم آزمائش کی اس گھڑی میں بلوچ عوام کے ساتھ ہے۔
