اسلام آباد : ایم کیوایم کے قائد الطاف حسین نے وزیراعظم یوسف رضاگیلانی سے فون پر گفتگو میں کہا ہے کہ،بلوچستان کے مسئلے پرآل پارٹیز کانفرنس بلائی جائے ، جبکہ وزیراعظم نے مسئلے کے حل کیلئے سنجیدگی سے غور کرنے کا یقین دلایا ہے۔
الطاف حسین نے کہاکہ بلوچستان میں جس قدرطاقت استعمال کی جائے گی صورتحال اتنی ہی خراب ہوگی ،بلوچستان کے مسئلہ پرآل پارٹیزکانفرنس بلائی جائے، وہ بلوچ رہنما جوحالات سے مجبور ہوکر پہاڑوں پر چلے گئے ہیں انہیں بھی مذاکرات کی دعوت دی جائے ۔
الطاف حسین نے کہا کہ آئرلینڈمیں برطانیہ والے آئی آراے والوں کودہشت گردکہتے رہے ، لیکن آخر کار مذاکرات کی بدولت وہ بھی معاہدے تک پرپہنچ گئے ۔ وزیراعظم یوسف رضاگیلانی نے الطاف حسین کویقین دلاتے ہوئے کہاکہ، بلوچ ہمارے بھائی ہیں اور ہم بلوچستان کے مسئلے کے حل کیلئے سنجیدگی سے کوششیں کررہے ہیں ۔
