اسلام آباد : نوتشکیل شدہ ساتویں قومی مالیاتی کمیشن کا دو روزہ اجلاس آج اسلام آباد میں وفاقی وزیر خزانہ شوکت ترین کی زیر صدارت شروع ہورہا ہے، اجلاس میں شرکت کے لئے تمام ارکان کو اطلاعات بھجوادی گئی ہیں۔
صدر آصف علی زرداری نے نیشنل فنانس کمیشن کی پچیس جولائی کو تشکیل نو کی تھی ، جس کے تحت چاروں صوبائی وزراء خزانہ اس کے ممبر ہیں جبکہ دیگر چار ارکان میں پنجاب سے عبدالغفور مرزا، سندھ سے ڈاکٹر قیصر بنگالی ، سرحد سے سینیٹر حاجی محمد عدیل اور بلوچستان سے ڈاکٹر گلفراز احمد شامل ہیں۔
اس ضمن میں جاری کردہ نوٹیفیکیشن کے مطابق قومی مالیاتی کمیشن سروسز پر سیلز ٹیکس کے اطلاق ، وفاق کی جانب سے خام تیل پر رائلٹی اور قدرتی گیس پر سرچارج کی وصولیوں سے متعلق امور کے علاوہ وفاقی اور صوبائی سطح پر مالیاتی ڈسپلن کے اطلاق کا میکنزم وضع کرے گا۔
ذرائع کے مطابق اجلاس میں صوبوں کے درمیان مالی وسائل کی تقسیم کے فارمولے کا بھی جائزہ لئے جانے کا امکان ہے جبکہ این ایف سی کے قواعد و ضوابط پر بھی بحث کی جائے گی۔ اجلاس میں مالیاتی امور کے بارے میں چاروں صوبوں کی جانب سے اپنا اپنا موقف پیش کیا جائے گا۔
