کراچی : اسپین کی فٹبال ورلڈ کپ میں فتح کے ساتھ ہی جرمنی کے آکٹوپس کی ایک اور پیش گوئی درست ثابت ہوئی۔ تیسری پوزیشن کے میچ میں جرمنی کی فتح سے آکٹوپس جرمن مداحوں کا غصہ ٹھنڈا کرنے اور ا پنی جان بچانے میں بھی کامیاب ہوگیا ہے۔
برلن میں رہنے والا آکٹوپس فٹبال ورلڈ کپ میں آج کل اپنی پیش گوئیوں کی وجہ سے عالمی شہرت کا حاصل کرچکا ہے۔ فٹبال کے مداح ہوں یا سٹے باز ہر کوئی میچ سے پہلے اس انوکھے آکٹوپس کی پیش گوئی جاننے کے لئے بے تاب نظر آتے ہیں۔
پال نامی جرمن آکٹوپس فٹبال کے عالمی مقابلوں کے آغاز سے ہی مختلف ٹیموں کے درمیان میچز کی پیش گوئی کرتا چلا آرہا ہے۔ جو بالکل درست ثابت ہوئیں۔ تاہم اس نے سیمی فائنل میں جرمن ٹیم کی اسپین کی ہاتھوں شکست کی پیش گوئی کرکے نہ صرف لوگوں کو حیران کردیا۔ بلکہ اس کی پیش گوئی صیحیح ثابت ہونے پر جرمن مداح اس کے دشمن بھی بن گئے۔
جہاں پال تیسری پوزیشن کے میچ میں جرمنی کی فتح کی پیش گوئی کرکے جرمن مداحوں کا غصہ کچھ حد تک کم کرنے میں کامیاب ہوا وہیں اس نے فائنل میں فتح کے لئے اسپین کو چنا۔ جس کے بعد سے ہی ہسپانوی ٹیم کا مورال بلند ہوگیا۔ اور سنسنی خیز مقابلے کے بعد ہالینڈ کی فائنل میں شکست نے جہاں اسپین کو ورلڈ چیمپئن بنادیا ۔وہیں پال کو بھی عالمی شہرت دلادی ہے۔
